Service ṭha zawk pe turin phût

MJA, Lunglei district leh Lungleia tlawmngai pawl hrang hrang hruaitute chuan nimin khan Lunglei Press Club-ah Lunglei district-a inbiakpawhna lam (tele communication) chhe lutuk chungchanga hmalak dan tur an sawiho a; service provider-te chu service ṭha zawk pe chhuak turin an phût.

Sawihona hi Lunglei district MJA president Laltlanthanga'n a kaihruai a; Lunglei mai ni lo, a chhehvel khaw hrang hrangin inbiakpawhnaa harsatna an tawh mekte sawiin, pawl hrang hrangin hma an lo lak tawh dan leh service provider hrang hrangtea hmalakna awm tawhte a sawi.

Pawl hrang hrangte chuan thuchhuah inṭâwm an siam a; tunlaia Lunglei leh a chhehvela inbiakpawhna ṭha lo lutuk chu lungawithlak loh an tih thu te, service provider-te chu mipuia an inzawrh ang ngeiin an customer-te hnenah service ṭha zawk pe chhuak turin an phût. Service ṭha zawk an pe lo a nih chuan chak zawk leh na zawka hmalak ni rawh se, an ti.

Kalkhawmte chuan hun remchang hmasaah Lunglei district-a service provider hrang hrang hotute koh khawm an rél bawk.