Niminah hripui vei dam tawh 481 an chhuak

July 17, Pathianni khan Mizoramah swab sample endik mi 212 aṭangin Covid-19 vei mi 57 hmuh chhuah a ni a, July thla chhungin mi 1,540 hmuh a ni tawh. Nimin khan hripui vei dam tawh mi 481 chhuahtir an ni a, Covid-19 vanga thi an awm lo.

Pathiannia hripui vei hmuh tharte Rapid Antigen Test hmanga hmuh chhuah vek niin, positivity rate 26.89% a ni a, endikna dang hmangin sample endik a ni lo. Mi 57-te chu mipa 21 leh hmeichhia 36 an ni.

IDSP record angin, Mizoramah Covid-19 vei 2,30,646 hmuh chhuah a ni tawh a, mipa 1,07,368 leh hmeichhia 1,23,278 an ni a, mipa aiin hmeichhia 15,910-in an tam zawk. Nimin tlai dar 5 thleng khan mi 2,29,172 (99.36%) chhuahtir an ni tawh a, mi 706 (0.31%) thi tawhin, enkawl mek mi 768 (0.33%) an awm.

Kum 2011 chhiarpui angin, Covid-19 vei hmuh tawh 2,30,646 chu state mipui zat aṭangin 21.02% a tling a; mi 1,000 zelah positive 210 an awm tawh ang a ni a, hripui vangin mi 1,00,000 zelah mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm tawh rih lohna district pahnih - Serchhip leh Lawngtlai district a awm a; active case tamna ber Aizawl district-ah mi 367 an awm a, Lunglei district-ah mi 224 an awm bawk.