ZMC sawngnáwi taka a chhuah a hlauhawm - MLA Lalchhuanthanga

ZPM MLA Lalchhuanthanga chuan nimin khan ZPM party pisaa inkhawmah thu sawiin, State Referral Hospital tihlamzuihtute an sorkar leh mek avangin Zoram Medical College (ZMC) chu sawngnáwi taka a chhuah a hlauhawm thu a sawi.

Lalchhuanthanga chuan, ZMC chu a tirah chuan referral hospital angin a ding tih sawiin, "Tuna sorkar mekte sorkar laiin tihhlamzuih a ni a, Congress sorkar khan theih ang angin an buaipui a, an term tàwp dawnah medical college an puitlin thei a, August 2018-ah class ṭan a ni. Referral hospital tihlamzuihtute bawk tunah an sorkar leh ta a, ZMC hi sawngnáwi takin a chhuah a hlauhawm hle," a ti.

March 2023-ah MBBS first batch final exam neih a ni tawh dawn tih sawiin Lalchhuanthanga chuan, "ZMC hi recognise a la ni lo a, recognise ni lo aṭanga zir chhuak chu eng university-ah mah pawm a ni ngai lo. Medical practice leh a aia sang zawk specialist kan tih ang chite an zir thei ang em tih ngaihtuah tham a ni," a ti a; zirlai hmasa berte chu pass chhuak ta se, eng dinhmunah nge an din dawn tih ngaihtuah tham a nih thu a sawi.

Lalchhuanthanga chuan, ZMC chu recognise ni turin hmabak a la tam hle nia sawiin, "Recognise theitu chu National Medical Commission (a hmaa Indian Medical Council) a ni. NMC hi an lo kal khát em em mai a, nikum hmasa Covid hmaa an lo kal bâk kha chu an lo kal leh tawh lo," a ti.

NMC-in zirtirtu chungchangah duh dan a nei tih sawiin Chhuanthanga chuan, "Tuna ZMC dinhmun nen a inang lo hle. ZMC-ah department 21 a awm a, department 10-ah professor an nei a, department dang 11-ah an nei lo. Zirtirtu ṭhenkhat dah dan leh kaisan danah sorkarin duhsak bik a nei ngei niin a lang," a ti a; ZMC-a zirlaite hma lam hun ngaihtuahpui an ngaih thu a sawi.

ZPM inkhawmah hian an president Lalliansawta'n an party zawm thar mi eng emaw zat a lawm lut niin ZPM thuchhuah chuan a tarlang.