KHAWTHLIR

Thisen pe
Khawlailung Bunghmun Branch YMA chuan nimin khan thisen pek an huaihawt a, Serchhip District Hospital tan thisen unit 27 an pe a, petute hmeichhia 14 leh mipa 13 an ni.

MZU special exam
Mizoram University chuan nimin khan under graduate (B.A, B.Sc, B.Com) zirlaite tan special exam an buatsaih ṭan a, August 26, 2022 thleng a awh ang. Special exam hi CBCS course kalpui hma, kum 2011 aṭanga 2015 chhunga graduate hman lote tana buatsaih a ni.

In sak mek endik
Siaha district Legal Metrology department chuan kar kal ta chhung khan Siaha khawpui leh a chhehvela sorkar in (building) sak meka hmanraw hmante an endik a, an endik chinah tling lo a awm lo. Legal Metrology hian Eklavya Model Residential School, DC Office, District Social Welfare Officer pisate an endik a ni. Legal Metrology department hian a theih ang anga sorkar building sak lai leh sak thara hmanruate endik chhunzawm zel an tum.

Service charge lâk phal a ni lo
Central Consumer Protection Authority (CCPA) chuan, Consumer Protection Act, 2019 Section 18(2)(1) kaihhruaina tun hnai khan a tichhuak a; hotel leh restaurant-ah thil ei/in man bâk chu a leitute aṭanga service charge lâk khap a nih thu a tarlang. Hotel leh restaurant service charge-a lungawi lote tan an awmna DC-ah zualko theih a ni a, District Collector-te'n a ṭul angin CCPA-ah an thlen ṭhin dawn a ni.

Viltu tur din
Champhai district election officer James Lalrinchhana, bawrhsap chuan, Champhai District Monitoring Committee on Accessible Election din a nih thu a tarlang. Committee-ah hian chairman chu District Election Officer niin, Election Officer chu member secretary a ni. Committee hi mi tin ban phâk leh kalpawh theiha inthlanna buatsaih a nih theih nana hmalakna enfiaha viltu tur a ni a, kum 2023-a Assembly inthlanpui leh 2024-a Lok Sabha inthlanpuia rualbanlote'n vote an thlak theihna tura hmunhma buatsaih leh ṭul dangte an buaipui dawn a ni.