Sorkarin phalna a pek ngei ringin Winery atan grape lei mek a ni

Champhai Grape Growers Society (CGGS) leh Hnahlan Grape Growers & Processing Cooperative Society (HGGPCS) chuan sorkarin grape wine siam leh zawrh a phalsak ngei beiseiin tunlai hian grape an lei khawm mek.

Vanglaini palai zawhna chhángin HGGPCS hruaitute chuan, grape quintal 827 an lei tawh thu an sawi a, "Grape hi a chhiat hma êm avangin a umna turah dah nghal zel a ngai. Sorkarin wine siam leh zawrh min phalsak ngei kan ring tlat a, chuvangin kan lei khawm mek. Tunlai hi grape thar hun a ni a, kan theih ang angin lei zel kan tum," an ti.

HGGPCS hruaitute chuan, grape lawh hun a nih mek avangin lawh a nih loh chuan a tla rîral mai mai dawn tih sawiin, "Kan leisak loh chuan kut hnathawktute thawhrah a thlàwn mai mai dawn a ni," an ti a, sorkarah beiseina sang tak an neih thu an sawi.

CGGS hruaitute chuan Vanglaini palai zawhna chhangin, Champhai leh a chhehvelah chuan grape an la thar tam loh thu an sawi a, "Tun hnaiah quintal 60 vel kan lei tawh a, kan la lei belh zel ang. Sorkar pawhin wine siam leh zawrh phalna min pe thuai dawnin kan hria a, beiseina sang tak nei chungin grape kan lei khawm mek a ni," an ti.

Grape chìn chawlhsan mai an tum loh thu sawiin CGGS hruaitute chuan, "Grape rawn chíng thar, kan member-a rawn inziak lut tharte pawh an awm belh zel," an ti a, grape chìn chu mi tam tak eizawnna a nih thu an sawi.

CGGS leh HGGPCS hian grape kg. khat Rs 60-in an lei a, CGGS chuan a báa leiin, wine an hralh hunah a man an pe dawn. HGGPCS chuan grape an lei chu a neitute hnenah a man an pe nghal zel thung.