Aizawlah ram, leilung leh nungcha Humhalh kawngzawh huaihawt a ni

Youth for Environment Justice, Mizoram (YEJM) chuan nimin khan Aizawlah ram, leilung leh nungcha humhalhna kawngzawh an huaihawt a; Mizo mipuiin hmasawnna an duh rualin, ram, leilung leh nungcha tihchhiat tel an duh loh thu an tarlang.

Environment Justice Rally hi chawhma dar 11-ah Vanapa Hall kawtah ṭan a ni a, mi 1,500 vel telin, Sikulpuikawn thleng kawng zawh a ni. Tuikhuahtlang lamah kalin, Principal Chief Conservator of Forest (PCCF) pisa kawtah leh National Highways Infrastructure Development Corporation Limited (NHIDCL) pisa bulah dingin an au rual a ni.

Kawngzawhah hian, Mizorama hmasawnna hna thawh a nih dawnin environment kaihhnawih danin a phûtte ti hmasa lo leh zâwm loa hmalak an duh loh thu tarlangin, "Hmasawnna kan duh a, kan environment tihchhiat erawh kan phal tawh lo," an ti a; ecosystem hrang hrangte nunna inkhaidiat an nihna anga humhalh an duh thute an tarlang bawk.