Aizawla khelmual parukah phûl lem phahna tur tender mek a ni - Tawnluia

Deputy chief minister Tawnluia chuan, UDPA department hnuaia Smart City Project kaltlangin Aizawla khelmual parukah phûl lem phahna tur tender mek a nih thu a sawi a, "Lammual hi I-League inkhelh theihna turin chei leh ruahman sorkarin a tum," a ti.

Nimina Lammuala Inter Village Football Tournament khàrna a hmanpuinaah thu sawiin Tawnluia chuan, "Aizawl khawpuia football khelhna tur field puitling pahnih chauh kan neihin min dâwl tawh lo a, UDPA department hnuaia Smart City Project kaltlangin Aizawl khawpui chhunga khelmual parukah phûl lem phahna tur tender mek a ni," a ti a; Mizoram sorkarin ṭhalaite tan infiamna hmunhma buatsaih kawngah theihtawp a chhuah mek thu a sawi.

Tawnluia chuan, football-a inelna lian neih leh hunah Lengpui leh Sairangahte inkhelh ngai tawh loin Aizawlah ngei a rualin hmun paruk/pasarihah inkhelh theih a nih a beisei thu a sawi a; Lammual chu Mizo mipui rilruah a lian a, I-League khelh theihna turin chei leh ruahman sorkarin a tum thu te, MFA-in tournament hlawhtling taka an buatsaih chu lawmawm a tih thute a sawi bawk.

Final inkhel hi Assembly speaker Lalrinliana Sailo,

Sports minister Robert Romawia Royte, EFCC minister TJ Lalnuntluanga leh MLA ṭhenkhatin a hmunah an en a ni.