Mizo Language Development Board A taka kalpui turin rules nghak mek

Mizo ṭawng tihhmasawn, tihhausak, chawikàn leh venhim kawnga hma latu tur leh thuneitu tura duan Mizo Language Development Board Bill, 2022 chu Assembly House-ah pass a ni tawh a, mahse, rules peih a la nih loh avangin Mizo Language Development Board chu a taka kalpui a la ni lo. Rules hi School Education department-in an peih tawh a, Law & Judicial department-in an endik mek.

Vanglaini palai zawhna chhángin Human Resources Development Borad (HRDB) vice chairman L Thangmawia, MLA chuan, Chief Minister thu angin Mizo Language Development Board din turin hmalak a nih thu a sawi a, "Kan ṭawng chungchangah thuneitu an awm ngai lo a, a buaipuitu chu awm mah se, thuneihna an nei chuang lo. Allocation of Business-ah pawh eng department hnuaiah mah a la awm ngai lo a, tun sorkarah Education department hnuaiah dah a ni," a ti.

L Thangmawia chuan, Assembly House-ah Mizo Language Development Board Bill, 2022 pawm a nih hnuah a taka kalpui theihna tura pawimawh rules buaipui nghal a nih thu sawiin, "Rules hi department lam chuan kan peih tawh a, Law department-ah pawmpui tura thawn niin, nghah mek a ni. Rules-ah hian chairman leh secretary ruatna turte a chuang," a ti a; pisa tur tihfel a ni tawh a, a cheina tur sum sorkarah dil mek a nih thu a sawi.

HRDB Vice Chairman chuan, Board chu thuneihna sang tak nei, autonomous body a nih dawn thu sawiin, "Act-ah chuan inziak chiah lo mah se, a policy-ah chuan Lushai ṭawng kal zel kan tih chauh ni lo, Zo hnahthlak hrang hrang ṭawngte pawh buaipui tura din a ni," a ti.

Mizo Language Development Board-ah hian chairman leh secretary bakah, ex-officio pathum - MBSE Chairman, SCERT Director leh Art & Culture Director an awm dawn.

Member turte chu Mizoram Academy of Letters leh Mizo Writers Association aṭangin mi pahnih ve ve, Mizoram University aiawh pakhat leh Mizo paràwn pahnih an ni a; anni bakah hian Board chuan a duh chuan educationist pahnih thawhpui atan a ruat thei dawn bawk.