Tlawng hnár humhalh chungchang sawiho

Tlawng Hnar Reserved Forest Verification Team chuan nimin khan Lunglei DC conference hall-ah sorkar leh khawtlang hruaitute nen Lunglei Zobawk Reserved Forest Area-a Tlawng hnár an enfiah tawhnate an sawiho.

Additional principal chief conservator of forests RS Sinha chuan, Gauhati High Court, Aizawl Bench thupek angin verification team din a nih thu a sawi a; zirchianna report chu Mizoram Chief Secretary hnenah an thehluh thuai tur thu te, ramngaw, nungcha, tuihna leh lui tui humhalh chu EFCC department tum bulpui ber a nih thute a sawi bawk.

Ṭhutkhawmah hian Zobawk leh Lungpuizawl khawtlang hruaitute leh tlawmngai pawl aiawhte an tel a; Verification Team hnenah hian District Park leh Sports Complex sak mekte chu khawtlang tana ṭangkai leh pawimawh a nih thu leh Tlawng Hnar Reserved Forest Area notification dated 04/05/1978-in boundary description a sawi páwn lama awma an hriat thu an sawi.

Zobawk leh Lungpuizawl khawtlang hruaitute chuan, PHE department hmalaknaa check dam siam tawh chu Zobawk leh a chhehvel khawtlangin ṭangkai taka hmang an hman mek thu te, water recharging dam siam tum chu tuihna humhalhna tura hmalakna ṭha tak a nih thu an sawi bawk.