Oil depot siamna tur hmun enfiah

Food, Civil Supplies & Consumer Affairs (FCSCA) department hotute leh Indian Oil Corporation Ltd. aiawhte chuan nimin khan tuialhthei phurh luh dah khawlna, oil depot siamna tura ruahman Bairabi an tlawh a; oil depot changtlung zawk siamna tura ruahman ngaite an sawiho.

Oil depot siamna tur endiknaah hian FCSCA secretary Ramdinliani, director Dr H Andrew Vanlaldika leh joint director V Laldinsang te an tel a; IOC Land Selection Committee aiawhin DGM (Operations) Joydeep Dey, DGM (Engineering) Guneswar Ronghang, DGM (Security) Dipdyuti Chowdhury leh Bimalendu Sahay an tel. Northeast Frontier Railways-a hotute an tel bawk.

Sorkar thuchhuah tarlan danin, tuialhthei dah khawlna tur changtlung zawk siam a nih theih nan Mizoram sorkarin hun eng emaw chen hmun a thlithlai tawh a, chumi hmalakna kal zelah chuan IOC-in oil depot bunna tura ram an mamawh zat acre 30-35 chu Bairabi leh Sihhmuiahte an lo en tawh a ni.