Ni 119 hnua hripui vei hmuh tam ber ní

July 18, Thawhṭanni khan Mizoramah swab sample endik mi 1,010 aṭangin Covid-19 vei mi 280 hmuh chhuah a ni a, ni 119 hnua hmuh chhuah tam ber ní a ni. Nimin khan hripui vei dam tawh mi 303 chhuahtir an ni a, Covid-19 vanga thi an awm lo.

Thawhṭannia hripui vei hmuh tharte chu mipa 145 leh hmeichhia 135 an ni a, Rapid Antigen Test hmanga hmuh chhuah vek niin, positivity rate 27.72% a ni.

July 18-a Covid-19 positive hmuh chhuah zat 280 chu ni 119 hnu, kumin March 21 hnua hmuh chhuah tam ber a ni a, March 21 khan mi 287 hmuh chhuah a ni. Kumin July thla chhungin mi 1,820 hmuh chhuah a ni tawh.

IDSP record angin, Mizoramah Covid-19 vei 2,30,926 hmuh chhuah a ni tawh a, mipa 1,07,513 leh hmeichhia 1,23,413 an ni a, mipa aiin hmeichhia 15,900-in an tam zawk. Nimin tlai dar 5 thleng khan mi 2,29,475 (99.37%) chhuahtir an ni tawh a, mi 706 (0.31%) thi tawhin, enkawl mek mi 745 (0.32%) an awm.

Kum 2011 chhiarpui angin, Covid-19 vei hmuh tawh 2,30,926 chu state mipui zat aṭangin 21.05% a tling a; mi 1,000 zelah positive 210 an awm tawh ang a ni a, hripui vangin mi 1,00,000 zelah mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm tawh rih lohna district pakhat - Lawngtlai district chiah a awm a; active case tamna ber Aizawl district-ah mi 377 an awm a, Lunglei district-ah mi 177 an awm bawk.