Ṭul loa sum sên titawp turin sorkar phût

Peoples‘ Conference party senior vice president Vanlalruata chuan, Mizoram sorkar chu nawmchenna leh ṭul loa sum sènna zawng zawng titawp turin a phût.

Nimina PC party pisaa inkhawmah Vanlalruata chuan, Finance Commissioner-in Mizoram sum dinhmun chhiatzia leh Mizoramin suma harsatna a tawh hnaih thu tih a sawi a, "Mizoram sorkar hian nawmchenna ang maia ngaih theih ṭul loa sum a sènna zawng zawng titawp nghal vek rawh se," a ti.

Finance Commisioner-in CSS sum pek chhuah tur a nih avanga Mizoramin harsatna a tawh theih tur thu a sawi chu sorkar sum enkawl thiam loh vang leh ṭul loa sum sên a tam lutuk vang a nih thu sawiin Vanlalruata chuan, "Mizoramah hian hun rei tawh tak aṭang khan mahni sum dinhmun siamṭhat tum lo leh ngaihtuah miah loin ṭul loah sum tam tak a sêng ṭhin a, dan kalha sum chawk kâwiin, duh duh danin a kal ṭhin," a ti a; dan loa CSS sum sorkar inrêlbàwlna (revenue expenditure) atana pawhpèn ṭhin a ni chu lungchhiatthlak a tih thu a sawi.

PC Senior Vice President chuan, Mizoram sum dinhmun ṭhat loh dan aṭangin Sri Lanka dinhmun anga din a hlauhawm thu sawiin, "A nihna takah chuan Sri Lanka dinhmun ai hian kan chhe zawk hial a ni," a ti a; dinhmun ṭha lo tak aṭanga Mizoram chhan chhuak turin PC party chu an inring tâwk tih a sawi a ni.