KHAWTHLIR

Thisen pe
407 Truck Owners Association chuan an din champha vawi 32-na lawm nan nimin khan Civil Hospital, Aizawl blood bank tan thisen unit 17 an pe a, petute mipa 16 leh hmeichhia pakhat an ni.

Ei tur siamte training
Health department hnuaia Food & Drugs Administration leh CII-FACE chuan July 18, Thawhṭanni aṭang khan Aizawla thingpui dawr, restaurant leh catering nei, FSSAI license/registration nei tawhte tan training an buatsaih ṭan a, July 22, 2022 thleng a awh dawn. Training hi a thawh khatna a ni a; ni khatah mi 50 zel tel tura tih niin, ni nga chhungin mi 250 tel tura ruahman a ni.

Rangkachak lem man
Kolasib Police Station chuan July 17, 2022 khan Khuangpuilamah lirthei aṭangin metal bar eng pali, rangkachak ni ngeia rin an man a, chumi kaihhnawihah chuan Johny Zonunsanga (33) s/o Lalṭanpuia (L), Bawngkawn Shalom Veng leh Lalpekthanga (35) s/o K Zosangliana te an man nghal. Police tarlan danin, an thil man chu endik a nih hnuah rangkachak lem a ni tih hriat a ni a, thubuai ziah luh niin, chhui zui mek a ni.

HTE dinhmun sawiho
Chief minister Zoramthanga hoin nimin khan Higher & Technical Education (HTE) minister Dr R Lalthangliana bakah, HTE, DPAR leh Finance department hotute'n HTE department-a thawktu dinhmun leh thawktu indaih lohnate an sawiho. HTE hnuaiah hian sorkar college 21 leh law college pakhat bakah, Mizoram Hindi Training College, Institute of Advanced Studies in Education, Women Polytechnic leh MPL-te a awm mek a ni.

Thilpek hlàn
Harish Chander Nanda Educational and Charitable Society, New Delhi chuan Mizoram Police-in English medium school a kalpui mek pangate tan computer panga, water cooler pali, white board pali, plastic chair 25, sound combo panga leh steel almirah pali an pe. Thilpekte hi July 18, Thawhṭanni khan Arya Mess aṭangin DGP Devesh Chandra Srivastava chuan sikul panga hotute hnenah a sem a ni.