Feb 2017 thlenga HIV hrik pai 14,446 ; Thla 8 chhungin HIV+ve 1,406-in pung

February 2017 thleng khan Mizoramah mi 5,98,812-te thisen endik a ni tawh a, chu'ng zinga mi 14,446 chuan HIV hrik an pai tih hmuhchhuah a ni. Record-a a lan danin, thla riat (July 2016 - February 2017) chhungin Mizoramah HIV hrik pai 1,406-in an pung.

Mizoram State AIDS Control Society (MSACS) aṭanga thu dawn danin, October 1990 aṭanga kumin February thla tawp thlenga Mizoram puma thisen enfiah tawh zat 5,98,812 tih hi mihring zat a ni lo a, mi pakhat pawh ṭum khat aia tam an awm thei a ni.

Thisen enfiah tawh 5,98,812 aṭanga HIV positive hmuhchhuah zat, 14,446 hi enfiah tawh zat aṭangin 2.41% a ni.

MSACS hriat theih chinah kumin February thla tawp thleng khan HIV positive thi tawh zat chu mi 1,418 a ni a, hei hi HIV hrik pai hmuh tawh mi 14,446 aṭangin 9.81% a ni.

MSACS website-a record tarlan tharlám berah chuan, December 2015 thleng khan Mizoramah thisen endik mi 3,43,687 an awm a, HIV positive zat chu mi 11,001 an ni. HIV hrik pai thi zat chu mi 1,162 a ni bawk.

December 2015 leh February 2017 inkar, thla 14 chhunga thisen enfiah zat chu mi 2,55,125 niin, HIV hrik pai hmuh chhuah thar zat chu mi 3,445 an ni tihna a ni a; HIV hrik pai thi zat chu thla 14 chhungin 256-in a pung tihna a ni.

Hetih lai hian, Vanglaini-in November 25, 2016-a chhuakah June 2016 thlenga MSACS record a tarlanah chuan, nikum June thla tawp thleng khan thisen endik tawh mi 5,54,644 awmin, chu'ng zinga mi 13,040 chuan HIV hrik an pai tih hmuhchhuah a ni a; AIDS vangin mi 1,313 an thi tawh.

Nikum June thla leh kumin February thla inkar, thla riat chhungin Mizoramah thisen enfiah mi 44,168 (598812 - 554644 = 44168) awmin, HIV hrik pai mi 1,406 hmuh chhuah belh (14446 - 13040 = 1406) an ni tihna a ni a; thla riat chhung vêk hian HIV hrik pai mi 105 an thi (1418 - 1313 = 105) tihna a ni bawk.

MSACS project director Dr Lalmalsawmi Sailo chuan Vanglaini palai zawhna chhangin, tunlaia HIV/AIDS dona atana an kalpui ber chu awareness campaign a nih thu a sawi a, "FHI-360 nen ṭang dunin kohhran hrang hrangah awareness campaign kan nei chho mek," tiin, tun hnaiah Presbyterian Kohhran, Baptist Kohhran leh UPC Kohhranahte awareness campaign an neih thu a sawi.

Dr Lalmalsawmi Sailo chuan, HIV/AIDS dona leh mipui hrilhhriatna atana hma an laknaah mipat hmeichhiatna thianghlim lo hman chu an ngaih pawimawh ber a nih thu a sawi a, "Hmun hrang hrangah condom hman a pawimawh thu tarlang mah ila, kan ngaih pawimawh ber chu sex thianghlim lo aṭanga inthiar fihlîm a ni," a ti.

MSACS Project Director chuan, sorkar damdawi-in hrang hranga thawkte chu an huam chhunga mipuiin thisen an enfiahtir theih nana ṭan la tura an ngen thu sawiin, "Inthup leh thisen enfiah ngam lo an tamin a lang si a, thisen test hi a tam chuan rei lo te-ah chuan HIV hrik pai zat hi 50%-a a tlakhniam kan beisei," a ti a; mipuite chu thisen enfiahtir hreh lo turin a ngen.