International Diversity Day hmang

Nimin, May 22 kha International Diversity Day a ni a, he ni pual hian Mizoram State Diversity Board leh Environment, Forests & Climate Change department chuan nimin khan Assembly Annexe-ah inkhawm an buatsaih. Khuallian tura beisei chief minister Lal Thanhawla a damloh avangin a thuchah chhiar chhuah a ni.

Chief Minister chuan a thuchahah hian, mihring pung zelin mamawhna hrang hrang a tihpun thu a tarlang a, "Hei hian hmasawnna kalpui lamah ramngaw a tichereu a, dimdawi taka nungcha leh ramngaw enkawl a pawimawh," a ti.

Mizoram chu zir mite'n nungcha hausakna neihna hmun ‘biodiversity hotspots’ ah an ngaih thu tarlangin CM Hawla chuan, "Heng rohlu, ramngaw mawi tak te, lui dung leh nungchate leh nunna nei dang chi tinrengte duata humhalh chuan ram thil neih (asset) hlu leh tlo berah a chhuah theih a ni," a ti a; ramngaw leh a chhunga cheng nungchate chu khualzin hîp theihna hmanraw ṭha tak a nih theih thu a sawi.

Inkhawm hmanpuitu, Assembly deputy speaker R Lalrinawma chuan, Mizoram University-in nungcha hrang hrang hausak dan leh a chhinchhiahna bu an siam, 'People’s Biodiversity Register' tih a tlangzarh.

International Diversity Day-ah hian mithiamte'n thupui hrang hrang hmangin biodiversity hmanga khualzinte hîp theih dante an sawi a ni.