Hockey World League champion team-a tel Lalhlunmawii MSSC-in an lawmpui
Hockey World League Round 2-a champion, India team-a tel Lalhlunmawii (19), Thenzawl chuan May 21, Pathianni khan Aizawl a lo thleng a, Lengpui Airport-ah Hockey Association, Mizoram hruaitute'n an lo hmuak. Nimin khan Mizoram State Sports Council (MSSC)-in an pisaah lawmpuina hun an buatsaih.
April 1-9, 2017 chhung khan West Vancouver, Canada-ah Hockey World League Round-2 khelh a ni a, hetah hian India hmeichhe team chuan final-ah penalty shoot-out hmanga chak zawk zawnnaah Chile chu 3-1 in an hneh a ni.
Lalhlunmawii lawmpuina atan hian MSSC secretary C Laltlanthanga chuan kit allownce Rs. 10,000 leh sports bag a hlan.
Lalhlunmawii hian kum 2008 khan Women's Hockey Training Centre, Thenzawlah a zawm a, kum 2015 khan India junior camp-a tel tura koh a ni a, nikum khan India hmeichhe senior team-ah a lut a ni.
Lalhlunmawii hi kumin kum tira India leh Belarus-in Bhopal-a test match an khelhah India team tan a khel ṭan a, World Hockey League Round-2, Canada-a neihah India senior team-ah tel zuiin, match zawng zawngah a khel kim vek a ni.