Public Library Day hman a ni

Art & Culture department buatsaihin nimin khan Mizoram State Library-ah Public Library Day vawi thumna hman a ni a, Art & Culture minister R Romawia'n a hmanpui.

R Romawia chuan, khaw­tlang leh zirna hmasawnna atan lehkhabu ṭha chhiar pawimawhzia hriaa Public Library Day kum tin hman a ni ṭhin chu lawmawm a tih thu a sawi a; "Library chu finna robawm a ni," tiin, lehkhabu aṭanga mite'n finna an chhêk khawl chu chhiara hmasawnna atan hmang ṭangkai lehzual turin kalkhawmte a chah.

Public Library-te a changtlun zel nan a enkawltute chu mipuiin lehkhabu an duh ang an lo neih loh chuan chhinchhiah a, library-ah kawl ngei tuma hmalak a pawimawh tih sawiin R Romawia chuan, "Raja Ram Mohan Roy Library Foundation hnuaiah state library leh district library-te tihchangtlun zel a ni," a ti.

Inkhawmah hian State Library leh district library member aṭanga lehkhabu hawh ṭha lawmman pakhatna aṭanga pathumna sem a ni.

Mizoram State Library hi kum 1974-ah din a ni a, tun dinhmunah lehkhabu 62,074 hawh theihin a awm. Sorkar pawmpui NGO library 485 an enkawl bawk.