KHAWTHLIR

Compartmental Exam hun ruat
Mizoram Board of School Education (MBSE) chuan, Higher Secondary School Leaving Certificate (HSSLC) Examination 2017-a compartmental chance neite tana exam hun atan June 20, 2017 a ruat. Exam hi district khawpui tina centre pakhat ṭheuhah neih a ni dawn a, exam turte tan exam centre-ah May 25 thleng leh MBSE office-ah May 30 thleng exam form thehluh theih a ni ang.

Thisen pe
Inter Branch YMA Football Tournament khelh meka tel, Khawkawn Branch YMA football team chuan nimin khan Aizawl Civil Hospital-ah thisen unit 11 an pe. Champhai Kahrawt ṬKP unit pawhin May 20, Inrinni khan an silver jubilee pualin Champhai District Hospital tan thisen unit 21 an pe a, a petute mipa 16 leh hmeichhia panga an ni.

CM damlo
Tunlai hian chief minister Lal Thanhawla a nuamsam lo a, amah enkawltu doctor-te'n ni thum chhung tal engmah ti loa châwl hahdam (complete rest) turin thurâwn an pe. Hei vang hian Chief Minister hian tun hnaia programme a neih sate pawh a hmanpui thei lo a ni.

Manipur film zir
Manipur-a film siamtute nena thawhhona ṭha nei tur leh, film siam kawnga an tih dan phung zirturin IPR jt. director Lallianpuii hoin MFDS hruaitute chu nimin khan Imphal an thleng a, an cham chhungin Manipur sorkar hotute leh film siamtute an kawm ang.