NEDP hnuaiah ruih theih thil laka Naupang ven dan ruahmanna siam

Mizoram sorkar chuan thuchhuah siamin, naupangte zûk leh hmuam leh ruih theih thil laka an fihlim theihna tura venpui leh zirtirna turin, New Economic Development Policy (NEDP) hnuaiah 'Early intervention against tobacco usage and drug abuse from upper primary school' kalpui tum a nih thu a tarlang.

Sorkar thuchhuah tarlan danin, mithiamte zir chiannaa a lan dan­in, Mizorama cheng zingah 70% dáwnin zuk leh hmuam an khawih a, chu'ng zinga 90% chu vaihlo leh a kaihhnawih ti ṭhin an ni.

Vaihlo vanga cancer chi hrang hrangah India ram pumah Mizoram a sang ber a, Global Adult Tobacco Survey 2009-10 in a tarlan danin, vaihlo ti ṭhin zinga 9.3% chuan kum 15 an tlin hmain vaihlo an ti ṭan a, mi 69.5% chu kum 15-19 inkara vaihlo ti ṭan an ni.

Mizoram chu ruih theih thil tawlh­na hmunpui, Golden Triangle tia an vuah bula awm a ni a; vaihlo aṭanga ṭanin, ruih theih thil dang tih belh zel theihna kawng a inhawn zau avangin, naupangin an tih chhin hmaa venpui leh zirtir a ṭul tih hriain, Mizoram sorkar chuan NEDP hnuaiah project kalpui ṭan a tum a ni.

He project-ah hian General Administration Department chuan hma a la a, Aizawl DC kaihhruaina hnuaiah hma latu department hrang hrang leh tlawmngai pawlte thawkhoin, Coordination & Implementation Committee-in hmalak zel dan tur rêl ṭhin.

Research & Documentation Sub-Committee din a ni a, zûk leh hmuam, ruih theih thil ṭhat lohna entir thei tur chi hrang hrang buatsaih tum a ni. Aizawl district chhunga sikul 50 vel chu hmalak ṭanna (pilot project) atan hman a ni dawn.

Project chungchang hi Aizawl DC pisa website-ah en theih a ni a, kalpui zel dan tur kawnga rawtna nei apiang chuan DC office-ah emaw, DC office official Facebook page-ah thehluh theih a ni.