MPC-in MHMSA lungawi lohna an thlawp

MPC party office bearer-te nimina an pisaa an president Lalhmangaiha Sailo hoa ṭhukhawm chuan resolution an siam a; Mizoram Health Multipurpose Service Association (MHMSA)-in recruitment rules (RR) siamṭha tura sorkar an karna atana lungawi lohna an lantir chu âwm an tih thu leh an thlàwp thu an tarlang.

MPC party hian Mizoram sorkar chu Mizoram mipui hriselna atana thawktu pawimawh health worker, health supervisor leh community health officer-te harsatan bengkhawn duh loah an puh a, "A thlahthlam rengna hian pawi lian zawk a hrin loh nan sorkar pawh inthing harh vat se kan duh hle," an ti. MHMSA-te thil phut chu tihhlawhtlinsak ngei turin Mizoram sorkar an phût a ni.

MPC chuan, chief minister Lal Thanhawla’n mipuite world class education a tiam laia sorkar sikula board exam-a pass awm lohna (nil) sikul awm ṭhin chuan zirnaa Mizoram sorkar hlawhchhamzia a tilang niin an sawi bawk.