HIV positive hmeichhia damdawi ei ṭhate'n Oct 2014 hnuah an fate an la kai chhawng lo

October 2014 aṭang khan, Mizorama HIV hrik pai nu nau pai zinga taksa tihchakna ART ṭha taka ei zingah an nau hrina HIV hrik kai chhawng an awm tawh lo a; nu aṭanga HIV hrik kai chhawng lo tura hmalakna kawngah Mizoram chu India rama a tiṭha state paruk zingah a tel.

MSACS project director Dr Lalmalsawmi Sailo hnena aṭanga thu dawn danin, May 19, 2017 khan New Delhi-a NACO Committee Room-ah National Core Group on Elimination of Mother to Child Transmission (EMTCT) of HIV/Syphillis meeting neih a ni a, MSACS project Director pawh a tel. He hunah hian Mizoram chu nu aṭanga a faa HIV hrik kai chhawn tihtlemna kawnga hmalaknaah state tiṭha paruk zingah a tel thu puan a ni.

HIV hrik pai nu aṭanga a faa HIV hrik leh Syphillis (dadu) kai chhawn tihtlemna kawnga hma la ṭha state parukte chu - Mizoram bakah, Maharashtra, Tamil Nadu, Karnataka, Madhya Pradesh leh Telangana-te an an ni a; Mizoram chu hmarchhak state zinga tel awm chhun a ni.

Nu-in a faa HIV hrik leh Syphillis a kai chhawn tihbo tumna hi October 2014-ah kalpui ṭan a ni a, Mizoramah pawh hmalak nghal a ni. HIV hrik paite tan ART damdawi multi drug regimen (MDR) pek ṭhin an ni a; ART damdawi ṭha taka ei nu zingah October 2014 hnu lamah an faa HIV leh Syphillis kai chhawng an la awm lo.