Zirlai hruaitu MNF-a an lut ṭhin hi An tih âwm tak a ni - Zoramthanga

Students’ Self-Support Union (SSU) president hlui Zaithanmawia Chhangte leh SSU-a hruaitu ni ṭhin mi 16-te chu nimin khan MNF president Zoramthanga'n MNF party-ah a lawm lut. Zoramthanga chuan, zirlai hruaitu hluite MNF-a an lut ṭhin chu an tih âwm tak a nih thu a sawi.

MNF President chuan, "Zirlai hruaitu hlui rualte'n vai party ni lo, a ram neitu party-ah an lo lut ṭhin hi an tih âwm tak a ni a, a lawmawm hle. MNF-in kan duh chu, vai tel loa dinchhuah a ni a, SSU pawh mahni kea din chhuah tum pawl an nih ṭhin avangin a inhmeh bik a ni," a ti. Chief minister a nih laiin SSU chu an theih ang tawkin pui ve mah se, an budget a la tlem avangin duh ang tâwka puih a la harsa niin a sawi bawk.

MNF vice president Dr R Lalthangliana pawhin thu sawiin, MNF chu ṭhalaite huang ni turin an inhawng zau hle tih a sawi a, "Ṭhalaite tan hmun zau tak hawnin a awm reng a ni," a ti.

Dr. R Lalthangliana chuan MNF-in Assam Rifle-te khawpuia awm tir an duh ve loh thu sawiin, "Zokhawsanga an insawnna sakna tur pawh Ministry of Home Affairs aṭangin ni 12.03.2008 khan cheng vbc.145 chuang chu tihfel a ni tawh," a ti a, Congress sorkarin AR sawn chhuak turin hmalak chhunzawmna a neih loh thu a sawi.