Chhiatrupna a thlena hman tura duan lirthei tlangzarh

Kolasib DC Dr. Arun T hmalaknaa chhiatrupna a thlena hman tur bika duan lirthei chu nimin khan Lok Sabha MP CL Ruala’n a tlangzarh.

Lirthei ah hian chhan­chhuahna hmanrua leh ṭul dang chi hrang hrang - generator 30KVA, bold cutter pahnih, chainsaw bullet, hrui leihlawn, traffic cone & cordoning tape, spot light, reflector vest, silpoulin, power extension cord 25mtrs, head gear leh life jacket te dah a ni a, a ṭul anga thuam ṭhat zel tum a ni.

Vanduaina leh chhiat tawhna a thlena a thlawna biak theihna tur number 1077 pawh peihfel tawh a ni a, tun dinhmunah hian vodafone leh bsnl atang a biak theih a, service provider dang atang pawha biak theih thuai tura ruahman a ni.

Kolasib DC hmalakna hian district chhunga sor­kar department hotute leh village council tinte hnena thlipui tleh tur, ruah sur nasa tur leh lirnghing tur sms hmanga inhriattirna siam a ni bawk.