Covid-19 do nan DC-11 hnenah DMR department-in Rs. 7,53,81,592 an pe
Mizoram sorkarin Covid-19 donaa Disaster Management & Rehabilitation (DMR) department sum, district bawrhsap tin hnena a pek tawh leh pek tura a tihfel tawh chu Rs. 75,3,81,592 a ni; hetah hian quarantine-a awmte ei leh in senso atana an pek chhuah leh tur tihfel tawh Rs. 1,68,50,400 a tel.
DMR department hotute chuan, Covid-19 dona atana DC-te hnena sum an pek chu a kimchanga an hmanna an hriat loh thu leh, sum sênna a tam avangin DC-te an la indaih loa an rin thu an sawi.
DMR hotute sawi danin, Covid-19 dona atan district 11-ah ṭum thum sum an pe chhuak tawh a; an pek chhuah hunte chu March 25, April 21 leh June 2-ahte a ni.
DC-te'n DMR aṭanga sum an hmuh an hmanna tlangpui chu - quarantine centre-a awmte leh thawktute ei leh in te, quarantine centre chei ṭhatna te, DMR-in sum a pek chhuah hmaa an lo hman rulhna te, phai aṭanga lo hawte khung hran an nihna hmuna an mutna tur (mattress) leh thil dang leina te, volunteer-te lawmman te, hmai tuamna, hand sanitizer leh PPE leina te, lirthei hmannate leh thil ṭul dangte a ni.
DMR department hotute chuan, sum pek chhuah leh tur eng emaw zat a la awm tih sawiin, chu'ngte chu pek chhuah turin tihfel a nih tawh thu leh DC-te hnenah an pek chhuah thuai tur thu an sawi. Sum pek chhuah leh tur aṭanga 40% - Rs. 1,68,50,400 chu district 11-a quarantine centre-a awmte ei leh in atan a nih thu an sawi bawk.
District 11 bawrhsapte hnena sum an pek chhuah hmasak ber March 25, 2020-ah Rs. 1,24,98,000 pek a ni a, a vawi hnihna April 21-ah Rs. 77,77,000 leh a vawi thumna June 2-ah Rs. 3,82,56,192 pek chhuah a ni.