Airport chei ṭhat mek chim chungchangah High Court-in sorkar sawifiahna a nghak

March 10, 2022-ah Lengpui Airport chei ṭhat lai meka in sak chim chungchangah Gauhati High Court Aizawl Bench chuan thil hrang hrang sawifiah turin Mizoram sorkar a hriattir tawh a, chawlhkar li chhung hun pek niin, sorkar leh an aiawhte'n an sawifiah hun nghah mek a ni.

Lengpui Airport-a in sak mek chim chungchangah hian Vanramchhuangi leh a ukilte chuan June 28, 2022 khan Gauhati High Court, Aizawl Bench-ah public interest litigation (PIL) an thehlut. Justice Michael Zothankhuma leh Justice Marli Vankung te ṭhutna High Court chuan pawmin, Mizoram sorkar, contractor Kamlova Chhangte (Kamrul Laskar) leh an ukilte chu thil pawimawhte sawifiah turin a hriattir tawh.

High Court order, July 12, 2022-a chhuaka a lan danin, Kamlova Chhangte hnenah Mizoram PWD chuan September 1, 2021-ah restricted tender hmangin Lengpui Airport chei ṭhat tur hna, Improvement/Upgradation of Operational/Non-Operational Facilities of Lengpui Airport an pe a ni.

Airport chei ṭhatna atana sum ruahman zat chu nuai 7,010 a ni a, chu'ng zinga nuai 5,041 chu sorkar laipuiin Special Assistance to States for Capital Expenditure kaltlanga Mizoram sorkar a pek aṭanga ruahman niin, cheng nuai 1,969 chu North East Special Infrastructure Development Scheme (NESIDS) aṭanga ruahman a ni thung.

Gauhati High Court chuan, hna lian tham (major work) cheng nuai 7,010 mana restricted tender hmanga hna pek chhan leh kalphung pangngaia tender chhuah a nih loh chhan sawifiah turin Mizoram sorkar a hriattir a; contractor dang - Zoramchhana, Electric Veng leh R Vanlalhluna, Edenthar Vengte September 1, 2021-a restricted tender-a an tel ve chhan sawifiah turin a hriattir nghal.

Restricted tender chu thil hmanhmawh­thlak bik takah building contractor ṭha leh rintlakte aṭanga koh tur a ni tih tarlangin Court chuan, May/ June 2022-a Class-I contractor ni chauh Kamlova hnena cheng nuai 7,051 vel man hna lian pek a nih chhan sawifiah tur leh Mizoram sorkar hnuaia Kamlova hnathawh tawh (work experience) sawi chiang turin a ti bawk.

Kamlova Chhangte hnenah hian Septem­ber 1, 2021-ah restricted tender hmangin Lengpui Airport chei ṭha turin hna pek a ni a, hna pek a nih aṭanga thla kua (9) vel hnuah class-I contractor-ah thlan/puan chauh a ni.

Vanramchhuangi ukil Joseph L Renthlei chuan, contractor Kamlova Chhangte-in Environment, Forest & Climate Change (EFCC) department aṭanga phalna la loin thing eng emaw zat a kih thu a tarlang. High Court chuan Kamlova'n thing kih phalna a dil leh dil loh leh, phalna pek a nih leh nih loh sawi turin EFCC department a hriattir bawk.