Japanese Encephalitis veia hriat Mizoramah hmuh chhuah a ni

Tun hnai khan khawvel hmun ṭhenkhata natna an hmuh chhuah thar, thosi seh aṭanga kài theih Japanese Encep­halitis vei nia hriat Mizoramah hmuh chhuah a ni.

Vanglaini thu dawn danin, Japanese Encephalitis vei nia rinhlelh hi Thenzawl khua a ni a, Aizawla mimal damdawi-in pakhat­ah enkawl mek a ni. A nat danah Japanese Encephalitis vei nia rinhlelh a nih avangin a awmna district leh Aizawla medical lam hotute'n uluk takin an vil a, a ṭul angte an buaipui a ni.

Zawhna chhangin IDSP nodal officer Dr Pachuau Lalmalsawma chuan, anni IDSP aṭang chuan thu puan chian theih an la nei lo tih a sawi a, "Tunah hian phai lamah a sample thawn a ni tawh a, finfiahna kan la dawng lo. A vei ngei a ni tih finfiahna kan dawn hma chuan keini chuan sawi tur kan nei lo," a ti.

Dr Pachuau Lalmal­sawma chuan, damlo chu uluk taka ngaihven a nih thu sawiin, "Thil ṭul ang angte theihtawp chhuahin kan buaipui nghal," a ti a; a chenna leh enkawl mek a nihna district CMO leh a thawh­puite'n buaipui ngai apiang an buaipui thu a sawi.

Japanese Encephalitis hian khawsik sáng tak leh lu ná a thlen thei a, a nasaah chuan thluak lam pawh a khawih thei a ni.