Kolasib district-ah kum chanve chhungin HIV vei 43 hmuh a ni

Kumin January aṭanga June thla thleng khan Kolasib district-ah HIV vei mi 43 hmuh chhuah a ni a; financial year liam ta 2021-22 chhung khan mi 107 hmuh chhuah a ni.

Nimin khan Mizoram State AIDS Control Society (MSACS), Society for HIV/AIDS and Lifeline Operation in Mizoram (SALOM), Centre for Disease Control and Prevention (CDC), I-TECH, PEPFAR leh PATH-te'n HIV ṭâi darh dan zirchianna leh a darh zel tur venna tura hmalakna Project Sunshine chungchang an sawiho a; Kolasib district-a HIV/AIDS dinhmun tarlan a ni.

Tarlan danin, January-June, 2022 chhung khan Kolasib-a Integrated Counselling and Testing Centre (ICTC)-ah mi 1,960-te thisen endik a ni a, chu'ng zinga mi 43 chu HIV positive an ni tih hmuh a ni. Hetih lai hian, kum 2021-22 chhung khan mi 3,720 endik a ni a, HIV+ve mi 107 hmuh chhuah a ni thung.

Sawihonaah hian Kolasib-a Chief Medical Officer pisa, Police department, District Child Protection Office, chanchinbu mi leh pawl hrang hrang aiawhte an tel a; HIV inkài chhâwn tamna hmuna ngaihah zirchianna neih ṭha an ti a, thla khat chhungin zirchianna kalpui tura hmalak a ni ang.

SHALOM hotu Dr Chawnglungmuana chuan, Project Sunshine chu Aizawl, Kolasib, Lunglei, Champhai leh Mamit district-ahte kalpui a nih tur thu leh, Cross Border Intervention bik chu Zokhawthar, Kanhmun leh Vairengteah kalpui a nih dawn thu a sawi.

PATH consultant Dr Sampath Kumar chuan, ramri kâna HIV inkai chhàwn dan tlangpui, HIV veite enkawl dan leh a darh zel tur vèn dante a sawi bawk.