Sum dinhmunin hniam zel vangin Rálkhèl dár vuak a ngai ta - MPCC

Mizoram Pradesh Congress Committee (MPCC) chuan, Mizoram sum leh pai dinhmunin hniam lam a pan zel avangin rálkhèl dár vuak a ngai ta hiala an ngaih thu an tarlang. MPCC hian an hruaitute term pawhsei an remti a ni.

Nimina Lal Thanhawla Auditorium-a MPCC Executive Committee ṭhukhawm chuan resolution siamin, "Mizoram sorkara Finance Commissioner-in sum leh pai lama harsatna a zualkai tur thu a sawi, ni tin chanchinbua lo lang kha Congress party chuan a ngai thu tak hle. Ngun taka a zir chianin, Mizoram sum leh pai dinhmun hian hniam lam a pan zel a, rálkhèl dár vuak a ngai ta hialah kan ngai," an ti.

MPCC resolution chuan, "Sum leh pai lama harsatna naménlo kan tawh chhan hi eng dang vang ni loin, Pu Zoramthanga kaihhruai MNF sorkarin a tlaran zawnga ram an hruai vang a ni," a ti a; Lal Thanhawla kaihhruai Congress sorkarin inrenchem taka sum leh pai dinhmun an siamṭhat tawh chu MNF sorkarin kum li ral hmain dinhmun chhe takah a dah thu leh pawi an tih thu a tarlang.

MNF sorkarin hmuh lêt lehna tur awm lo thilah sum tam tak a hman ṭhin avangin Mizoram leiba nasa takin a pung tih sawiin MPCC chuan, "Hei hi siamṭhat thuai a nih loh chuan Mizoram hi leiba thang (debt trap)-ah a táng ang a, mipuite'n kan tuar nasa hle dawn a ni," an ti.

Congress party chuan, Mizoram sum leh pai dinhmun chungchanga Finance enkawltu CM Zoramthanga a ngawi tlat chu a mawhphurhna a lâk thutak lohzia tichiangtua an ngaih thu sawiin, "Mipuite'n sorkar sum leh pai dinhmun dik tak kan hriat theih nan white paper tichhuak vat turin sorkar kan phût tlat a ni," an ti a; MNF sorkar chu sum dinhmun siamṭhat hna thawk vat turin an chah.

MPCC president Lalsawta kaihhruaia MPCC Executive Committee ṭhukhawm hian MPCC hruaitute term chu July 24, 2022-ah tàwp dawn mah se, kum 2023-a Assembly inthlan thleng pawhsei an remti a ni.