ZMC endik turin NMC beisei reng a ni - MNF Ṭhalai

Zoram Medical College endikna hnuhnung (final inspection) ti turin National Medical Commission (NMC) beisei reng a nih thu leh ZMC hmasawnna tura sorkarin theihtawp a chhuah chu lawmawm a tih thu MNF party ṭhalaite chuan thuchhuah siamin an tarlang.

MNYF thuchhuah chuan, "Final inspection nei tur hian NMC lamte lo kal mai thei tura beisei reng a ni. An rawn tum hmasak zawk hi Covid lên avangin an rawn ṭhulh a, ZMC lam pawh inspection team-te hmachhawn thei tur hian a inbuatsaih reng a ni," a ti.

MNYF tarlan danin, ZMC faculty leh resident-ah mi 146 an awm a, an zingah professor 11, associate professor 21 leh assistant professor 38 an awm. Lâk tawh sa zawm mai tur professor pakhat a awm a; professor paruk leh associate professor tur paruk lakna tur advertisement chhuah a ni mek bawk.

ZMC chu Mizoram University-a ziah luh (affiliate) a nih thu leh degree pawh MZU-in a pek tur a nih thu sawiin MNYF chuan, "Tun hnaia MZU team-te'n inspection an neihah dinhmun ṭha takah a ding niin kan hria. ZMC-in boruak ṭha leh hma lam êng tak a neih laia MLA Pu Lalchhuanthanga’n zirlaite tana ngaihthlak nuam lo zawng leh ZMC hmel timâwk thei zawnga thu a sawi mai hi pawi kan tiin àwm lo kan ti tak zet a ni," an ti.

MNF ṭhalaite chuan, NHM hnuaia thawkte'n hna an zawm leh ta chu lawmawm an tih thu an sawi a; sorkar laipuiin CSS hnuaia thawkte hlawh a hun takah a pe ngai lo a, thla thum dana a rawn pe ṭhin niin an sawi bawk.