Mizorama Tripura sorkar hmalakna Titawp turin ZPM-in CM an ngen

ZPM General Headquarters chuan Chief Minister hnenah Thaidawr tlanga Tripura sorkar hmalakna titàwp tur leh Mizoram humhalh tura ngenna an thehlut.

ZPM party hruaitute leh Jampui tlanga Mizote inkawmhona bawhzuiin ZPM chuan nimin khan CM Zoramthanga hnenah lehkha an thehlut a; lehkhaah hian general secretary Lalmuanpuia Punte-in hming a ziak a ni.

Mamit district chhunga Thaidawrtlangah Tripura sorkarin khaw thlirna sak tumin hmanrua a chhawp a, chu chu Mizo Convention, Jampui hruaitute'n duh loin, Mizoram Chief Minister hnenah an thlen tawh thu ZPM chuan an lehkhaah an tarlang.

ZPM chuan CM hnena lehkha an thehluhah, "Mizoram chhungah ngei state ṭhenawm sorkarin hmalakna an nei hi thil ṭha lo tak niin kan hria. Jampui tlangdunga chengte duh dan leh hmalakna hi zahawm kan ti hle. Chuvangin, Mizoram state chhungah state dangin hma an la mek hi a rang thei ang bera titàwp tur leh kan ram chhung humhalh turin kan ngen che a ni," an ti.

ZPM chuan, an working president K Sapdanga leh hruaitu dangte'n July 14, 2022 khan Thaidawr tlang an tlawh a, Mizo Convention (MC), Jampui hruaitute nen an inkâwm a ni. Mizo Convention hruaitute chuan, Thaidawr tlang buaina chinfel vat a nih theih nan Mizoram sorkarin hma la se, Tripura sorkar nen inbe thuai se an duh thu an lo hrilh a ni.

Jampui tlangdunga khaw hrang hrang hruaitute pawhin, Thaidawr tlang chu Mizoram sorkarin a enkawl ngai loh avangin Tripura sorkarin a ta chei ta nia a lan thu an sawi bawk.