July thlaah hripui vei 1,960 hmuh tawh

July 19, Thawhlehni khan Mizoramah swab sample endik mi 469 aṭangin Covid-19 vei mi 140 hmuh chhuah a ni a, July thla chhungin mi 1,960 hmuh a ni tawh. Nimin khan hripui vei dam tawh mi 143 chhuahtir an ni a, Covid-19 vanga thi an awm lo.

Thawhlehnia hripui vei hmuh tharte chu mipa 59 leh hmeichhia 81 an ni a, RT-PCR laboratory-ah hmuh chhuah mi pathum leh Rapid Antigen Test hmanga hmuh mi 137 niin, Siaha leh Hnahthial tih loh district dang zawngah positive hmuh a ni.

July 19-a positivity rate chu 29.85% a ni a, July thlaah ni tin positivity rate 10% chung lam vek a nih bakah, ni 19 zinga ni 15-ah positivity rate 20% chung lam a ni.

IDSP record angin, Mizoramah Covid-19 vei 2,31,066 hmuh chhuah a ni tawh a, mipa 1,07,572 leh hmeichhia 1,23,494 an ni a, mipa aiin hmeichhia 15,922-in an tam zawk. Nimin tlai dar 5 thleng khan mi 2,29,618 (99.37%) chhuahtir an ni tawh a, mi 706 (0.31%) thi tawhin, enkawl mek mi 742 (0.32%) an awm.

Kum 2011 chhiarpui angin, Covid-19 vei hmuh tawh 2,31,066 chu state mipui zat aṭangin 21.06% a tling a; mi 1,000 zelah positive 210 an awm tawh ang a ni a, hripui vangin mi 1,00,000 zelah mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm lohna district a awm tawh lo a, active case tamna ber Aizawl district-ah mi 368 an awm a, Lunglei district-ah mi 156 an awm bawk.