Nun uluk turin CM-in zirlaite a chah

Aizawl North College chuan nimin khan Electric Veng YMA Hall, Aizawlah zirlai lut tharte lawmna leh zir chhuak tawhte thlahna hun an hmang. Khuallian chief minister Zoramthanga chuan, zirlaite chu nun uluk turin a chah.

CM Zoramthanga chuan, zirlai tharte lawmna leh zirlai hlawhtlinna changte lawmna hun hmannaa a tel thei chu lawmawm a tih thu sawiin, "Nangmahni leh chênpui te, khawtlang leh ram tan mi chhenfâkawm ni tur chuan nun uluk a, ruihhlo chi hrang hrang laka fihlim a pawimawh. Tumruhna leh chhelna nei tan ngam loh a awm lo. Mahni inthunun tur chuan tumruhna nasa tak neih a ṭul," a ti.

Sorkarin sum tam tak séngin ngawlveite enkawlna hmun a ruahman ṭhin tih sawiin Zoramthanga chuan, "NGO, kohhran leh khawvel huapa sum leh thâ tam tak sénga ruihhlo vanga kan buainate hi keimahni ṭheuhin ruihhlo kan tih loh ṭheuh chuan buaina kan insiam lo mai dawn a ni," a ti bawk.

Aizawl North College principal Prof. Haukhanlian Mate pawhin thu a sawi a, zirlai tharte chu zirlai an nih laiin hun hlimawm hmanga zirlaiah theihtawp chhuah turin a fuih.