Changkanna nei turin lehkhathiamin hma an hruai a ngai - Robert Romawia

Mamit College chuan nimin khan Mamit Chhimveng Hall-ah Freshers' Social cum Graduation Day an hmang a, minister of state Robert Romawia Royte-in a hmanpui. Minister chuan, "Changkanna nei turin lehkhathiamin hma an hruai a ngai ṭhin," a ti.

Robert Romawia Royte chuan, hmasawnna chu zirna-ina bul ṭan a ni ṭhin tih sawiin, "Changkanna nei tur chuan lehkhathiamin hma an hruai a ngai ṭhin. Khawthlang ram chuan theihna sang tak an nei a, human resource lamah theihtawp chhuaha ṭan kan lâk chuan thui takin hma kan sawn thei dawn a ni," a ti a; tourism lama hmasawn nan zirlaite chu YUVA Tourism Club din turin a sáwm.

Minister chuan, college zirtirtute chu theihtawp chhuaha zirlaite zirtir turin a chah a; graduate tharte pawh hmabak tam tak la nei an nih avangin taima taka tumruhna leh teirei peihna nen ṭhahnemngai taka an zirlaite zir turin a chah bawk.

Mamit College hi kum 1983-ah khawtlang hruaitute'n an din a ni a, Kaichhunga College (KC College) tih a ni. Kum 1993-ah deficit-ah dah a ni a, kum 2007-ah sorkar college a ni zui. Tunah hian first semester zirlai 51, second semester zirlai 48 leh third semester zirlai 61, an vaiin zirlai 160 an awm a, graduate thar 42 an nei a ni.