KHAWTHLIR

Rs 18,95,585 hmu
Assam-a Barak huam chhunga tun hnaia tuilian tuarte ṭanpuina atana Synod-in Aizawl khawpuia kohhrante hnena vehbûr a khawnah tualchhung kohhran 117 aṭangin Rs 18,95,585 hmuh a ni. Synod hian Cachar tuilian tuarte ṭanpui nan Rs 8,00,000 a lo pe lâwk tawh a, tualchhung kohhrante sum thawh khawm aṭanga a la bâng Rs 10,95,585 chu an pe leh dawn a ni.

Invên dan sawiho
Siaha District Task Force on Covid-19 chu nimin khan an chairman Lalsangliana, district bawrhsap kaihhruaiin DC conference hall-ah an ṭhukhawm a, Covid-19 laka invên dan tur an sawiho. Siaha khawpui hmun parukah Covid-19 vaccine lakna tur ruahman a nih thu tarlan a ni.

MZU leh MRB
Mizoram University leh Mizoram Rural Bank chuan July 19, Thawhlehni khan thawhhona thuthlung an ziak. Thuthlung hi Mizoram thingtlang khuaa ṭhalaite hmasawnna tura hmalakna atan ziah a ni.

Péngthuam enfiah
Chatlang Local Council, Aizawl Municipal Corporation (AMC) Commissioner leh Traffic Additional SP-te chuan AMC official dangte nen nimin khan Chaltlang MBSE office bul kawng péngṭhuama lirthei tlân dan leh kawngpui sira bawlhhlawh paih thenfai dan tur a hmunah an enho. Kawng péngṭhuamah lirthei tlân dan a felfai zawk nan city bus stand siam rem a ni a, péngṭhuam kawngpui sirah lirthei hûn phal a ni lo.

Bill hun pawtsei
Power & Electricity department chuan online hmanga electric bill pekah harsatna nei an awm ṭhin avangin July thla bika bill pek theih hun tawp chu July 29, 2022 thleng a pawtsei. Online hmanga electric bill peknaa harsatna awmte chu chingfel turin theihtawp an chhuah thu PE department chuan a tarlang bawk.