Online-in tui bill a pek theih ta

Public Health Engineering (PHE) minister Zodintluanga chuan, PHE tui lak man internet online hmanga pek theihna tur peih a ni tawh tih a puang a, "Mipuiin an in aṭangin tui bill an pe thei tawh ang," a ti.

PHE Minister chuan, mipuiin an in aṭanga tui bill an pek theih nan hun eng emaw chen kal ta

aṭangin PHE department officer-te'n an buaipui thu sawiin, "Tunah peih a ni ta hi hmasawnna ropui tak a ni a, officer-te inpekna a lawmawm jhle a ni. Hei hian nasa takin mipui tan awlsamna a thlen ngei kan beisei," a ti a; tunah chuan a duh tan tui bill pekna hmun (counter)-a kal ngai tawh loin, internet hmangin online bill payment a tih theih ta tih a puang a ni.

Zodintluanga chuan, online payment tih theihna tur hian PHE department chhungah vawi eng emaw zat sawiho a ni tih sawiin, mipuiin bill an pekte internet hmanga lo khalhkhawmna tur, payment gateway chu Infor­mation & Communication Technology (ICT) department-in an buaipui char char tih a sawi a, "An thawhrimna a fakawm hle a ni," a ti.

Finance department lamin online payment tih a nih theih nan clearance tih ngai zawng zawng an tihsak tih sawiin Zodintluanga chuan, "An chungah kan lawm hle. Tui bill online payment kan tih theih chhan hi PHED chu a hming tumtu ni mah ila, ICT leh Finance department-te'n phûr taka min ṭanpuina vang a ni a, team work ṭha tak kan nei a ni," a ti a; lawmawm a tih thu a sawi.

Online hmanga tui bill pe duhte chuan https://phebilling.mizoram.gov... ah luh tur a ni a, consumer number ziak lutin, an tui bill an pe thei tawh dawn a ni. Tui bill pekna chhinchhiahna detail chu an email-ah thawn let nghal a ni ang.

Tui bill pek a nih hian netbanking hmangtute chuan tui bill Rs. 500 chin hnuai lamah chuan transaction tinah service tax Rs. 5 an chawi ang a, Rs. 500 aia tamah erawh chuan Rs. 7 chawi a ngai thung. Mobile wallet hmangtute chuan transaction tinah service tax Rs. 5 an chawi ang.

Credit card hmangtute chuan transaction khatah service tax atan an bill pek zat aṭanga 1% an chawi ang a; debit card hmangtute chuan tui bill Rs. 2,000 chin hnuai lamah transaction tinah service tax 0.75% an chawi ang a, Rs. 2,000 aia tamah chuan 1% an chawi dawn a ni.