Higher secondary-a hman tur IES tlangzarh

Higher secondary school-a internal mark hman tur duan, Integrated Evaluation Scheme (IES) for Higher Secondary Stage booklet chu nimin khan MBSE conference hall-ah School Education minister H Rohluna'n a tlangzarh.

Education Minister chuan, IES chu zirna hma­sawnna atana hman­raw pawimawh tak a nih thu a sawi a, "2016-17 academic session-ah high school atan hman ṭan a ni a, higher secondary-ah kum 2017-18 aṭanga hman ṭan tur a ni. High school-a IES hman mek hi zirlaite'n an hlâwkpui a, lehkha an zir tam phahin school attendance pawh a ṭhat phah hle," a ti.

H Rohluna chuan, kum tawpa vawi khat exam hmang chauha teh ni lo a, tehfung hrang hrang hmanga kum tluana teh an nih dawn tawh avangin zirlaite leh zirtirtute chu inthlahdah loa an ṭan mar a ngai dawn tih a sawi a; IES thil tumte hlen chhuak turin rinawm leh dik taka hmang ṭheuh turin kalkhawmte a chah.

Inkhawmah hian School Education secretary P Lalchhuanga'n Mizo Language Committee leh MBSE ṭangkawp buatsaih, ‘Mizo Ṭawng Ziah Dan’ tih lehkhabu a tlangzarh bawk.

Integrated Evaluation Scheme hi pawl 11 leh 12-te tan academic session 2017-18 aṭangin hman a ni dawn a; exam, assignment leh test bakah, attendance, general studies, work experience leh physical and health education-ten mark an pu dawn a ni.