Ram ṭhan zelna turin sorkar hmalakna chauh a tâwk lo - CS

Chief secretary Lalmalsawma chuan, ram ṭhan zelna turin sorkar hmalakna chauh a tâwk ngai lo tih sawiin, "Ram economy chawikâng tur chuan private entrepreneurship chak tak a awm tel a ṭul," a ti.

Mizoram Entrepreneurship Development Monitoring Commi­ttee (MEDMOC) chuan nimin khan Entrepreneurship Knowledge Centre, Secretariat Complex-ah Entre­preneurship Development Scheme (EDS) hnuaia ei leh bar chak zawka a ṭhan theih nana mipuite entrepreneurship pawi­mawhzia zirtir tura thlan, entrepreneurship master trainer mi 10-te pualin training an buatsaih a, Chief Secretary-in hmanpuiin thu a sawi.

Lalmalsawma chuan, vocational course training neite chu an inzir chhuah hunah pawh an hna hmuhna tur chu sorkar ni loin, private company-te a nih thu a sawi a, "Khawi hmunah pawh ram a ṭhan dawn chuan sorkar hmalakna chauh a tawk ngai lo. Ram economy chawikang tur chuan private entrepreneurship chak tak a awm tel a ṭul," a ti.

Chief Secretary chuan, sorkarin a tih tur leh a tih theih chin chu mimalin an tlin loh chinahte a nih thu sawiin, "Mithiam leh remhre tak takte'n ram hmasawnna atan an thiamna hmanga leiliung nghêng, industry, service sector lam a ni emaw, ram economy ṭhanna chu thui tak entrepreneur-te kutah a in nghat," a ti a; entrepreneurship tihmasawn turin sorkar a inhawn thu a sawi.

Inkhawm hi Planning secretary Dr C Vanlalramsanga'n a kaihruai a; Planning deputy adviser Dr Lalrinchhana'n EDS kalpui dan tlangpui a sawifiah.

EDS hi January 18, 2017-ah tlangzarh a ni a, kum 2016-17 chhungin he scheme atan hian NEDP hnuaiah cheng nuai 200 dah niin, kum 2017-18 atan cheng nuai 500 dah leh a ni.

EDS hnuaiah hian March 2017 chhung khan district tinah entrepreneurship awareness neih a ni a, March 8-9 chhung khan Festival of Innovation, New Delhi-a buatsaih chu chhim turin zirlai tirh a ni bawk.