KHAWTHLIR

Zirlai chawimawi
Lunglei MZP chuan nimin khan Lungleia zirna in aṭanga HSLC leh HSSLC exam-a tiṭhate chawimawina hun Saikuti Hall-ah an buatsaih a, parliamentary secretary (School Education) Joseph Lalhimpuia'n a hmanpui. Lunglei khawpuia zirna in aṭangin HSLC-ah zirlai pathum leh HSSLC-ah zirlai pakhat top 10-ah an lang a, distinction-a pass HSLC-ah zirlai 94 leh HSSLC-ah zirlai 27 an awm a ni.

Quarter hawng
Rajya Sabha MP Ronald Sapa Tlau chuan nimin khan CYMA staff quarters, Tuikhuahtlangah a hawng. CYMA Press-a offset khawl thar chu nimin zing khan CYMA general secretary Lalhmachhuana'n CYMA Press-ah a hawng bawk.

Thisen pe
Kolasib Vengthar Branch KṬP chuan an din champha vawi 35-na pualin, nimin khan an Kohran Hall-ah blood donation camp an huaihawt a, Synod Hospital tan mipa 21 leh hmeichhia pahnihte'n thisen unit 23 an pe.

In kâp hlum
May 22 zan dar 7 vel khan Thingsai bul Ṭiau lui kamah Thanzama (48) s/o Tialchema, Thingsai chu silaiin kah a ni a, a hliam tuar loin nimin zing dar 2 vel khan a thi. Thingsai VCP hnen aṭanga thu dawn danin, Thanzama hi Ṭiau lui kamah a riak a, inhriat sual palh a awm avangin Myanmar lam aṭanga kah fuh a ni. Thanzama chhungte leh a kaptute pawh an inrem tawh niin an sawi.

Tlan theih
Traffic SP C Lalthanmawia chuan thupek chhuahin, Temple Square leh Vaivakawn inkara motor lian (SK 407 leh LPK) tlan hun a tidanglam a; 407 truck leh LPK-te tan bik zing dar 8:30 - 10:30 leh tlai dar 4 - 6 inkar tih lohah chuan chhuk leh chho zawnga tlan theih a ni.

School sport
Mamit District Secondary School Sports chu nimin khan Mamit GSA khelmualah ṭan a ni a; sikul 20 telin football, volleyball, badminton, table tennis leh athletics hmangin zirlaite an inel dawn a ni.