Thla 3 chhungin Serchhip district-ah Nau piang 269 zinga panga an thi

Serchhip District Development Coordination and Monitoring Committee (DISHA) chu nimin khan DC Conference Hall-ah chairman CL Ruala, Lok Sabha MP hoin an ṭhu a; kumin January-March inkarah Serchhip district-ah nau piang 269 an awm a, chung zinga panga chu kum khat an tlin hmain an thi tih tarlan a ni.

Meeting-a tarlan danin, January-March 2017 chhunga Serchhip district-a Infant Mortality Rate (IMR) chu 18.58 (nau piang 1,000-ah 18.58 an thi tihna) a ni a; nu, nau chunga thi an awm lo. Mi 650-te thisen enfiah niin, HIV hrik pai hmuh chuah thar a awm lo a; sikul 10 leh anganwadi 27-ah naupang 1,035-te hriselna dinhmun enfiah a ni.

PMGSY hnuaiah khaw kar kawng panga thawk mek a ni a; National Rural Drinking Water Programme hnuaiah Khawlailung leh Khawbel tan tui lak hna thawh a ni. Swachh Bharat (Rural) hmalaknaah district chhunga thingtlang khua zawng zawng (35)-ah open defecation free drive neih zawh a ni tawh a, khaw 35-te chu ODF-ah inpuang vek tawh.

National Social Assistance Programme hnuaiah tar pension dawng mi 1,570 an awm mek a, hmeithai châwmna dawng mi 164, rualbanlo pension dawng mi 47 an awm. January-March chhungin PMJDY hnuaiah bank account hawng thar mi 352 an awm bawk.

SSA hmalaknaah sorkar primary school 68-ah zirlai 1,900, middle school 53-ah zirlai 2,609 an inziak lut a; aided M/S pasarihah zirlai 670, lumpsum aided M/S pangaah zirlai 488, private P/S 39-ah zirlai 4,038 leh private M/S 33-ah zirlai 1,589 an awm. MGNREGS hnuaiah 2016-17 chhungin ni 37 hna thawh tawh a ni.

DISHA meeting-ah hian Serchhip district aṭanga MLA thlan tlin zingah Lalrinawma leh Vanlalawmpuii Chawngthu an tel a; sorkar official-te an tel bawk.