Mamit district SSA-a thawk tura lak hmun danga dah 50 chuang awm

MZP headquarters, Mamit chuan thu­chhuah siamin, SSA hnuaia Mamit district-a thawk tura lak, Mamit district páwna awm mek chung­a Mamit SSA hnuaia hlawh la mi 50 chuang an awm mek tih an tarlang a, chu'ng mite chu August 2017 ral hma ngeia Mamit district-a an post-ah dah vek turin thuneitute an ngen.

Mamit MZP chuan, SSA Mission, Mamit hnuaia post âwl awmte a rûka hnawhkhah a ni ṭhin tih sawiin, "Mamit district páwn lam mi lak an nihin, an thawhna hmun vawi khat pawh an kal hmain Aizawl leh hmun dangah insawn an dil a, an thawhna tur leh an hna hmuhna hmun kalsanin, hlawh hmuh nan chiah an hmang ṭhin," an ti.

Mamit SSA hnuaia thawktu tur lak a nih leh dawn chuan a hmuna awm thei ngei tur la tawh turin Mamit MZP chuan thuneitute an ngen a; SSA Mamit hnuaia thawk tura lak, an hna thawhna hmuna awm peih lote chu bàn vek tur leh an aiah Mamit district-a leh-khathiam leh ṭhahnemngai tur zawkte la turin sorkar an ngen a ni.

Mamit MZP chuan, Mamit College-a English department-a assistant professor tura lak Zosangliana Zuala chu tun thlengin Mamit College-ah a la kal lo a, J Thankima College-ah dah mek a ni tih an sawi a, "Vawi tam tak HTE minister Pu R Romawia leh thuneitu dangte hnena kan thlenin ngaihsak a hlawh lo a. Zosangliana Zuala hi kum 2017-18 academic session ṭan hma ngeia Mamit College-ah a kal duh lo a nih chuan a aiawh mi dang, Mamit College-a thawk duh tur la turin sorkar kan phût tlat a ni," an ti.