AMC-in an sum hmuh tur zinga A zatve pawh an la dawng lo

Aizawl Municipal Corporation (AMC) chuan nimin thleng khan sorkar kum liam ta, 2016-17 chhunga an sum hmuh tur aṭanga a zatve pawh an la dawng tling lo.

Vanglaini palai zawhna chhangin AMC mayor PC Lalhming­thanga chuan, kum 2016-17 chhungin general basic grant (GBG)-ah cheng nuai 1,597 leh perfomance grant (PG)-ah cheng nuai 471 hmu tur an nih thu a sawi a, "GBG hi instalment hnihin kan dawng ṭhin a, first instalment chiah kan la dawng. PG hi chu ṭum khata dawn ṭhin a ni a, kan la dawng lo," a ti.

AMC Mayor chuan, GBG leh PG chu sorkar laipuiin a rawn pe chhuak tawh tih sawiin, "Tunah hian AMC account-a dah luh mai theihin a awm tawhin kan hria," a ti a; sum an dawn hun tur erawh a hriat loh thu a sawi.

Sorkar laipui guidelines angin, sorkar laipuiin sum a pek chhuah aṭanga ni 15 chhungin AMC-in a dawng hman ngai lo tih sawiin PC Lalhmingthanga chuan, "UDPA department lam pawhin ṭan an lain ka hria a, mahse, a hun takah mi pe thei ngai lo. GBG second instalment an rawn pek chhuahna pawh a rei tawh khawp mai," a ti.

AMC Mayor chuan, AMC term hmasa lamah pawh a hun takah Mizoram sorkarin sum an pe thei ngai lo tih sawiin, "A hun taka pek a buaithlakna chhan ka hrethiam lo," a ti a; indem ngawt theih pawh nia a hriat loh thu a sawi.

PC Lalhmingthanga chuan, duh ang hun sum dawn a nih loh chuan harsatna a awm thu sawiin, "Khaw dinhmunte'n a zir lo thei a, duh huna pawisa hmuh a nih loh chuan hna thawh theih lohte a awm ṭhin. A hun taka hmuh ni se chuan tun ai hian hmasawnna hna thawh a awlsam lehzual ang," a ti.

AMC hian kum 2017-18 hian GBG aṭangin cheng nuai 1,846 an hmu dawn a, first instalment an la hmu lo. Kumin sorkar kum atana GBG pek chhuah a la hun lo hrim hrim nia thu dawn a ni.