Siaha dist-a raltlante an khuaah an kîr

Siaha district chhim tawp, Myanmar ramri depa khaw pahnih - Lungpuk leh Khaikhy khuaa Myanmar raltlante chu Siaha DC pisa leh Assam Rifles (AR) sipaite'n a ṭul angin an buaipui zel a; nimin khan an khaw lamah an kir leh nia thu dawn a ni.

1st. Assam Rifles hotute tarlan danin, May 19-21, 2017 chhung khan Myanmar rama Arakan state chhung, ramri aṭanga km. 14 vela hla Ralie khua aṭangin Mizoramah mi 340 vel an lut a, raltlante hi hel pawl an hlauh vanga Mizorama lut an ni. Raltlan zinga tam zawk chu hmeichhia leh naupang an ni a, nau pai mek an awm nual bawk.

Myanmar raltlante hi AR sipaite'n an buaipui a, Lunglei aṭangin officer leh doctor-te Lungpuk leh Khaikhy-ah an kal a; AR doctor-te chuan raltlante hriselna dinhmun an enfiah a, a ṭul angin damdawite an pe.

Siaha DC leh SP bakah, MADC sorkarin an theih ang anga buaipuiin, ei leh in turte an ngaihtuahsak bawk.

Myanmar aṭanga ral­tlante hi Siaha district-a sorkar hotu te, police, AR sipai leh MADC sorkar ruahmannain nimin khan an khaw lamah an kîr niin sorkar thuchhuah chuan a tarlang.

Nimina sorkar thu­chhuah tarlan danin, ral­tlante hi ramria internatio-nal boundary pillar no. 15 thleng sipai leh police-te'n an hruai a; ramri-ah hian Ralie khawtlang hruaitute'n lo hmuakin, an khuaah an let a ni.