2016-17 chhungin Lunglei dist-ah nausen 42 thi

Lunglei District Development Coordination and Monitoring Committee (DISHA) chu nimin khan Rajya Sabha MP Ronald Sapa Tlau kaihhruaiin Lunglei DC conference hall-ah an ṭhu a; kum 2016-17 chhungin Lunglei district-ah nausên kum khat hnuai lam thi 42 an awm tih tarlan a ni.

Ronald Sapa Tlau chuan, sorkar department-te chu ram hmasawnna hnuk chelhtu an ni tih sawiin, "Ṭhahnemngai taka mahni hna ṭheuh kan thawh hian ramin hmasawnna a pan dawn a ni," a ti a; mahni hnathawhna hmuna sûlhnu ṭha tak hnutchhiah ṭheuh thei tura ṭang turin an fuih.

Meeting-a tarlan danin, kum 2016-17 chhung khan Lunglei district-ah nausen kum khat hnuai lamin 42 an thi a, infant mortality rate (IMR) chu 18 (nau piang 1,000 zelah 18 an thi) a ni. Nu nau chunga thi pahnih an awm bawk.

Kum 2016-17 chhungin MGNREGS hnuaiah ni 32 inhlawhna siam a ni a, kum 2017-18 chhunga ni 52 inhlawhna tur labour budget pawh Empowered Committee-in a pawm tawh a, April 2017 thlenga job card nei zat chu mi 34,653 an ni. PMAY-G hnuaiah in 333 sak zawh a ni tawh a, PMKSY(WD) hnuaiah project 15 zinga pathum zawh tawh a ni.

Swachh Bharat Mission (Urban) hnuaiah YMA kaltlangin mimal inthiarna, Individual Household Latrine (IHHL) 150 siam a ni a; National Rural Drinking Water Programme hnuaiah khaw pathum leh sikul pathumte tui pek an ni. PMGSY hnuaiah kawng siam lai panga a awm a, pakhat siam zawh a ni tawh. Mi 5,268 hnenah Old Age Pension pek a ni bawk.

Meeting-ah hian Lunglei district aṭanga MLA zingah Chalrosanga Ralte a tel a; sorkar department hotu te, V/C member-te leh tlawmngai pawl aiawhte pawh an tel a ni.