Kolasib-ah ruihhlo hâl ral a ni

YMA sub-headquarter, Kolasib chuan YMA kumpuan bawhzuia Police, Excise leh YMA-te ṭanghoin ruihhlo an man Rs. 17,14,595 hû chu nimin khan Home minister R Lalzirliana'n Kolasib Khuangpuilamah a hâl ral.

Home Minister chuan, ruihhlo tihrêm kawngah Police leh Excise-te hnathawh thlir liam mai lo a, YMA-te'n ṭhahnemngaia an pui ṭhin chu chhuan­awm a tih thu a sawi a, "Dan loa ruihhlo zawrh man tur tam tak a awm hi a pawi hle. Mizo ṭhalaite leh nu leh pate kan ṭan a ngai a ni," a ti.

Ruihhlo hâlte hi heroin plastic bûrte 579, parvon spas mûm 3,615, pseudoephedrine mûm 3,11,135, ganja kg. 35, nitrozen tlêp 52 leh zu eng emaw zat a ni.