Unaute chu hlimna leh tawrhnate Kan inṭawmpui zel tur a ni - CM Hawla

Chief minister Lal Thanhawla chuan, Joint Action Committee Against Anti Tribal Bills, Manipur hruaitute hnenah lehkha a thawn a; Zo hnahthlakte chu unau an nih angin, lawmna leh hlimnate leh tawrhnate inṭawmpui zel tur a nih thu a tarlang.

Joint Action Committee Against Anti Tribal Bills, Manipur hruaitutete chuan kum 2015-a Manipur Assembly-in tlang mite dinhmun tiderthawng theia ngaih bill pathum a pass duh loh lantirnaa thi mi pariatte chu nimin khan Lamka, Churachandpur-ah vuia phûm an ni. Vuina hun hmanpui tur hian CM Lal Thanhawla pawh sawm a ni a, mahse, damlohna vangin a tel thei lo a, lehkha a thawn a ni.

Chief Minister hian a lehkhathawnah, JAC Against Anti Tribal Bills hruaitute chu martarte vuinaa tel tura an sáwm chu hlu a tih thu a hrilh a, "Thisena ka unaute bulah awmin he programme hi hmanpui ka duh che u a, mahse, ka damsam loh avangin doctor-te'n hahchawl turin thurawn min pe a ni," a ti a; martarte vuina huna a tel thei lo chu pawi a tih thu a tarlang.

Martar mi pariatte hming chu tlang mi, a bik takin Manipur tlang mite thinlungah a awm reng tawh dawn tih tarlangin Lal Thanhawla chuan, "An hming hi kan thinlungah rangkachak ziak angin a riak reng tawh ang. An nunna hlu tak an hlanna hian Manipur tlang mite chakna leh inunauna phuar nghet se. Khawvel hmun hran hrana cheng,an mahni hluttute thinlungah pawh an inhlanna hi chám reng rawh se,” a ti.

Mi pariatte vuina pual hian ZNP president Lalduhoma leh ZoRO President pawhin thuchah an siam. Vuina hun hi Churachandpur khelmualah neih a ni a; Mizoram aṭangin Mizo Students' Union (MSU) hruaitute leh mi ṭhenkhatte an tel a ni.

Manipur-a tlang mite'n an dodalte chu - The Protection of Manipur Peoples Bill, The Manipur Land Revenue & Land (7th Amendment) Reforms Bill leh, The Manipur Shops & Establishment (2nd Amendment) Bill te a ni a; Manipur Assembly-in August 31, 2015-ah a pass a ni.