Larsapin zirlaite tiṭhate a lawmpui

Governor Lt.Gen. Nirbhay Sharma chuan nimin khan Raj Bhavan-ah kumin HSLC leh HSSLC-a top 10-te leh an sikul principal leh nu leh pate lêngah a sáwm a, lawmpuina certifcate leh pawisa a hlan.

Larsap chuan, HSLC leh HSSLC-a top 10-te chu a lawmpui thu sawiin, "In zirlaipuite tan entawn tlak nih zel tum ang che u. Zirna kawngah heng HSLC leh HSSLC-te hi pawimawh tak leh mipuite pawhin an ngaihven ber a ni a, zirlaite tan an nakin zel hun atana an inbuatsaihna rahbi pawimawh tak a ni," a ti.

Tuna an hlawhtlinna chu duhtâwk mai lo a, tumruhna leh hmathlir nei râna zir zel turin zirlaite chahin Governor chuan, "In zirtirtute thawhrimna leh in hlawhtlin theih nana nu leh pate inpekna theihnghilh lo ang che u," a ti a; vaihlo, zu leh ruihhlo laka fihlim turin a chah bawk.