Mizoram Legislative Assembly-in GST hnuaia chhiah lakna tur a pass

Nimin khan Mizoram Legislative Assembly session, ni khat awh neih a ni a; India ram puma hman tur, chhiah lakna dan thar, Goods & Services Tax (GST) hnuaia Mizorama chhiah lakna tur, 'The Mizoram Goods and Services Tax Bill' pass a ni. GST hi India ram pumah July 1, 2017-a hman ṭan tura tih a ni.

Bill pu luttu Taxation minister Lalsawta chuan, chhiah lak dan thar ruahman turin sorkarin laipuiin kum 10 chuang kal tawhah Committee a din tih a sawi a, "He thil hi an khelna a rei tawh a, Mizoram aṭang pawhin Committee-ah tel ṭhin a ni. Constitution-in GST Council a piantir a, chipchiar zawkin chhiah lak dan thar hi tun hma lak dan nena danglam dâwrha siam a ni," a ti.

Taxation Minister chuan, tun hmaa Central chauhin thuneihna a neih ṭhinna Service Tax-ah state-in thuneihna a nei ve tawh dawn tih sawiin, "Inchuh buai a awm lohna atan fel takin state leh central-in a lak theih zat turah mumal taka ruahman a ni," a ti a; cheng nuai 150 chinah chuan state leh central-in 50% ve vea an insem tur thu a sawi.

GST-in a tum ber chu ram pakhatah chhiah pakhat leh market pakhat inṭâwm a nih thu sawiin Lalsawta chuan, "Tuna chhiah pek dan kan hman mekah chuan, sorkar laipuiin chhiah lakna pariat leh state-in chhiah lakna ṭhin pakua a nei a, hengte hi chhûnfin vek a ni tawh dawn. Local body-te'n chhiah an lak ṭhin erawh a tel lo ang," a ti.

Taxation Minister sawi danin, chhiah lak theih zat turah inhnialna a tam a, state tam zawk chuan cheng nuai 20 chin la lutte hnen aṭanga chhiah lak an rawt. Mahse, state tê deuh, sumdawng lian tam lohnate chuan cheng nuai 20 china lak a nih chuan chhiah tam tak an chân dawn avangin tihhniam an nawr a, hei vang hian Mizoram tiamin state pakuaah chuan cheng nuai 10 la lut chinah chhiah lak tur a ni.

GST hman a nih dawn tâk avang hian Mizoramin chhiah lakna dan a lo neih ṭhin pathum - petroleum-a chhiah lakna dan, The Mizoram Entry Tax leh Entertainment Tax lakna dante chu tihtawp a ngai dawn.

GST vangin tu state pawhin a hma aiin sum an lak luh tam zawk beisei a nih thu sawiin Lalsawta chuan, "State chanvoah Service Tax a tel tawh dawn avangin sum hmuh a tam beisei a ni. Sum hmuh tam beisei a ni chungin, state-in GST hman hnua chhiah a hmu tlem zawk a nih chuan, a kum hmasa aia a hmuh tlemna zat sorkar laipuiin zangnadawmna a pek theihna dan siam a ni," a ti.

Lalsawta chuan, GST chu online-a tih vek a ngai dawn tih sawiin, "Hmarchhak state ho chuan internet ṭhat tâwk loh avangin kan huphurh khawp mai. Internet pawh ṭha se inzir a ngai dawn hle a, Bill pass a nih veleh theihtawp chhuaha ṭan lak nghal a ngai dawn," a ti a; GST buaipuitute leh chhiah pe turte an inzir fe a ngaih tur thu a sawi.

Taxation Minister hian GST hman a nih dawn tâk vanga 'The Mizoram Value Added Tax Act, 2005' chu a hman theih dawn tak loh avangin, he dan tihdanglama 'The Mizoram Value Added Tax (Amendment) Bill, 2017' a pharh nghal a, House-in a pawm.

Nimin Assembly session-ah hian report pakhat leh paper pahnih pharh a ni bawk a; chungte chu - Committee on Local Fund Accounts report, 'The Mizoram (Animal Slaughter House) Rules, 2016 leh 'The Report of the Comptroller and Auditor General of India on General Scoial, Economic Revenue and Economic (PSUs) sector for the Year Ended 31 March 2016' te a ni.