Facebook-a thu post-ah Fimkhur turin hriattir

Mizoram Police CID (Crime) SP Lallianmawia chuan May 24, 2017 khan hriattirna (notice) a tichhuak a; Facebook group leh page-a thil post-ah fimkhur turin mi tin a hriattir a, dan phal loh thil post a awm chuan a post-tute leh administrator-te chungah dan anga action lak a nih tur thu a puang.

CID (Crime) SP chuan, Mizoram police-a Cyber Crime Cell-te'n Face­book group/page hrang hranga thil post-te uluk takin an vil reng tih tarlangin, "Group/page ṭhen khatah danin a phal loh thil hrang hrang post ṭhin a ni tih report a ni. Mipui hmuh theiha zahmawh rawngkai, saruak thlalak, hmeichhe zahawmna tibawrhbang thei thil leh mi tihmingchhe thei thil post-te hi India danpuiin a ngai thutak hle," a ti.

CID (Crime) chuan, tun hnuah chuan danin a phal loh thil post tawh lo turin mi tin an hriattir a, "Thu awih loa post lui an awm chuan, a ṭul angin a post-tute (administrator) chungah legal action na taka lak a ni dawn," tiin hriattirna a chhuah a ni.

CID (Crime) hian mi­­pui hriattirna an tih­chhuah hi Facebook-a group leh page ṭhenkhata administrator-te pawh an thawn nia thu dawn a ni.

"Dan bawhchhiatna lam hawi page-a post awm zawng zawngte a rang thei ang bera paih (remove) nghal tura hriat­tir i/in ni a. Tun hnuah dan bawhchhe zawnga khawsa tawh lo tura hriattir i/in ni nghal bawk e," tia ziah a ni bawk.

CID (Crime)-in hriattirna a chhuah
1. IPC Sec 500 hmangin intihhmingchhiatna post siam vangin kum hnih thleng tàntir theih a ni.
2. IPC Sec 504 hmangin chi leh chi, pawl leh pawl, hnam leh hnam inkara buaina chawk chhuak thei post siam hi kum 2 thleng tàntir theih a ni.
3. IPC Sec 509 hmangin hmeichhe zahawmna tibawrhbáng zawnga post siam hi kum khat tàntir leh pawisa chawitir theih a ni.
4. IPC Sec 354A(iv) hmangin zahmawh rawngkai thu post/comment/thu thawn hi kum khat lungin tàn theih a ni.
5. IPC Sec 292 hmangin mipui hmuh theiha zahmawh rawngkai post hi kum 2 emaw, kum 5 thleng emaw tàntir theih a ni a, kumtlinglote hmuh theiha tarlan phei chu IPC Sec 293 hmangin kum 3 emaw, kum 7 thleng tàn theihna a ni.
6. IT Act Sec 67 hmangin zahmawh rawngkai post hi kum 3 emaw, kum 5 thleng tan theih a nih bakah, cheng nuai 5-10 thleng chawi theihna a ni.
7. IT Act Sec 66E hmangin mi remtihna loa an zahmawh thlalak (serh leh hmeichhe hnute telin) emaw, video emaw, saruak thlalak emaw post siam hi kum 3 thleng tàn theihna leh Rs. 3,00,000 thleng chawi theih a ni.
8. IT Act Sec 67A hmangin sex video emaw, mi sex hmang lai thlalak emaw post hi kum 5 emaw, kum 7 thleng lung-in tàn theihna a nihi bakah, Rs. 10,00,000 chawih theihna a ni.
9. IT Act Sec 67B hmangin kumtlinglo zahmawh rawngkai emaw, saruak thlalak emaw, an zahawmna tichhe thei tur zawng emawa post siam hi kum 5 emaw, kum 7 thleng tàn theihna a nih bakah, cheng nuai 5-10 chawi theihna a ni.