Aizawl Civil Hospital-in faina hnatlang nei

Aizawl Civil Hospital (ACH) chuan, Officers & Staff Welfare Committee bultumin nimin khan faina hnatlang an nei a, MJA president Vanlalrema Vantawl-in a hawng.

Faina hnatlang hawn­na inkhawm tawi, ACH gate bula neihah MJA President chuan, Aizawl Civil Hos­pital-in faina kawnga hma a lakna chu thlawp turin ACH pantu mi zawng zawng a ngen a, "Kan ramah damdawi-in leh vantlang hmunte kan enkawl danah faina kan nunpui tâwk loh avangin kan inen chian a ṭul hle a ni," a ti.

ACH medical supe­rintendent Dr KL Remsanga chuan, damdawi-in tihfai hnatlang an neih chhan chu, a thawktute mai ni loin, damdawi-in pantu mipuite'n faina an nunpui theih nan a ni tih a sawi a, "ACH hi fai taka enkawl chhunzawm kan duh a, hei hi min chhunzawmpui zel turin mipui kan ngen a ni," a ti.

ACH-ah hian bawlh­hlawhte chi hrang pali-ah thliar hran a ni tawh a, chu'ngte chu a báwm bik, rawng hran ṭheuh - a hring, a eng, a sen leh a pawl a awm a, thil zum leh hriam lam chi paihna tur a la awm bawk. Bawlhhlawh thliar hran dan leh a paihna tur báwmte chu Dr LC Liana'n a sawifiah.

Aizawl Civil Hospital-in faina hnatlang an neihah hian mi 400 velin an department hmun leh an hnathawhna hmun ṭheuh an tifai a; faina thupui atan 'Damdawi-in i vawng fai ang u' tih an hmang a ni.