Sorkar pawmpuina hmu loin CHC pahnih tihchangtlun a ni

Health & Family Wel­fare department chuan, Strengthening of Health System (SHS) hnuaiah sorkar pawmpuina tel loin Khawzawl Community Health Centre (CHC) leh Hnahthial CHC tih­changtlun hna an thawk.

Nimina Finance mi­nister Lalsawta'n Assembly House-a a pharh tâk, The Report of the Comptroller and Auditor General of India on General Scoial, Economic Revenue and Economic (PSUs) Sector for the Year Ended 31 March 2016-ah chuan, Khawzawl CHC leh Hnah­thial CHC-te sor­kar pawmpuina tel loa tihchangtlun hna thawh a nih thu tarlan a ni.

CAG report tarlan danin, SHS hnuaiah Khawzawl CHC tih­changtlun hna hi Mission Flexipool Fund hmangin June, 2013 khan thawh niin, hna thawhna atan cheng vbc. 3.79 ruahman a ni a, report siam a nih lai thlengin thawh zawh a la ni lo.

Hnahthial CHC tih­changtlun hna chu SHS hnuaiah vek April 2012-ah thawh ṭan a ni a, a tira sum sèn tura ruahman chu cheng vbc. 1.34 a ni. Hna hi cheng vbc. 1.56 hmanga thawh zawh a ni a, hei hian inthiarna leh electrification a huam tel.

National Health Mission hotute chuan, sorkar pawmpuina loa CHC-te tihchangtlun a ni tih an pawm a, "Thuneitu sangte aṭanga ṭawngkaa thu kan hmuh angin dan dik lo hian thil kalpui a ni. Tun hnuah chuan hetiang thil dik loa tih hi pumpelh theih ni se a duhawm," an ti.